الثلاثاء، 19 يونيو 2007

أحنا ليه مش عاوزين نفهم


لما باشوف ناس لسه بتربى طيورولسه بتبيعها كدة

فى الخفاء فى البيوت بابقى مستغربة أحنا ليه مش عاوزين نفهم

أنه فى خطر ولازم نكون واعيين اكثر ولا احنا مستنيين ايه

وأما لاقى ناس مستواهم العلمى عالى والمفروض انهم مدركين حجم خطر انتشار

مرض انفلونزا الطيور وبرضوا مصريين انهم يشتروا من الناس دى الناس اللى مستخبية

ويكون ردهم انه لا دى كويسة وهيجيلها المرض منين

برضو باقول احنا ليه مش عاوزين نفهم

بس نتكلم مع مين ونقول لهم ايه هما ليه قافلين ودانهم وعنيهم مغمضينها

لما تكون وزارة الصحة مانعة التعامل مع الطيور بشكل مباشر

واحنا عماليين نخبيها ونربيها وندخلها بيوتنا

يبقى ليه مش عاوزين نفهم

ليه كل واحد ما يبتديش بنفسه ويبلغ عن أى طيور فى أى مكان ويتعامل مع الموضوع بجدية

وبلاش كلمة وانا مالى طيب بس وانت مالك أذاى

واذاى هنحاتفظ على عدم تطور مرض انفلونزا الطيور عندنا


وأحنا رافضين نفهم
تخيلو انة فى محلات للدواجن بتجيييب الفراخ حية كدة من أماكن مجهول مصدرها
ذى الناس اللى بتربى دى وتقعد بقى الفجر بعد ما كل الدنيا تنام والرجل تخف
ويقعدوا بقى يدبحوها ويجهزوها وكمان يغلفوها ويبعوها على انها جاية من المجزر
وطبعا لا هما عارفين حجم المرض اللى ممكن يصيبهم ويصيب اللى هيشتريها
وكل دة علشان يجيلهم قرشيين زيادة ورافضيين يفهمو
اننا لازم نتعاون كلنا مع بعض علشان نوقف من تطور المرض دة وأننا لازم نكون اجابيين اكثر

وواعيين أكثر لحجم المشكلة ونساعد فى علاجها

لاننا بموقفنا السلبى بنشارك فى تطور المرض

ويارب كلنا نفهم

27 التعليقات:

S H A H يقول...

ايه يعني مناكلش فراخ طازة و لا ايه
و بعدين مفيش فراخ بلدي متلجة

لا لا ارجوكي بلاش الحملات اللي تاثر على الغدا بتاعي

وبعدين ابن اختي الصغير بيحب ييجي يتفرج على الفراخ و هيا بتتدبح"الدمية القاتلة" فاكراه

اكيد بخرف طبعا مش تخاريف

بس الموضوع ان الوعي بالمشكلة عندنا او عند الفئة اللي بتربي الطيور ديا اللي معدومة و كمان مش من السهل انه يستوعبها

خاصة لما يقولك ان ما هوا الايدز شوفي بيقتل كم واحد كل سنة سواء هوا او الكبد الوبائي

هتيجي يعني على انفوانزا الدجاج

و نروتيني يا هنونة

3abdo me7tas يقول...

لا حول الله يا رب انتو عايزين تقطو رزق الناس ليه العمر واحد والرب واحد
عادى انا شغال مع البقر وما أدراك أمراض البقر اللى بتتنقل للانسان انا لسه ملسوع من فيرس من البقر قريب وعادى اهو احنا عايشين

Unknown يقول...

ياهنا
متنسيش اننا عايشين فى مصر
انا عن نفسي مقدرش استغني عن الفراخ
حتي لو كان عندها عبط
الشعب المصري طول عمره ماشي على مبدأ
قول يا باسط
ومحدش بيموت مرتين
وخليها ع الله
البلوج بتاعك رائع جدا
الى الامام دائما

hana يقول...

S H A H
يعنى هوة ان ماكنش فراخ بلدى يبقى مش هناكل ههههههههه وبعدين فاكرة بن أختك العسل دة ربنا يخليهولك

نتكلم بقى جد
يعنى رغم الاعلانات فى الاذاعة والتليفزيون
والكلام حتى اللى بينا وبين بعضنا فى الشوارع وفى الشغل وفى كل مكان
دة المفروض يرعب ويخلينا نخاف ونحافظ ونلتزم
الظاهر حتى التوعية مش كل الشىء المشكلة فى
رفض البشر للفهم والتنفيذ
المشكلة بجد فى مدى تقبلهم للموضوع انا مش فاهمة اذاى مش قادرين يفهمو
ليه يربوا ولا يببعوا الطيور طالما فى خطر بيهدهم ويهدد الكل
انا عن نفسى ما كلتش غير الفراخ المذبوحة فى المجزر المثلجة الجاهزة يعنى
نورت بجد

hana يقول...

3abdo me7tas
احنا مش عاوزين نقطع رزق الناس ولا حاجة
بس دى مشكلة واتحطينا فيها ولازم نواجهها
والا الفيرس ممكن لاقدر الله يتحول لصورة أخطر.لازم نتعاون كلنا سوى

وربنا معاك فى

شغلك الخطر دة
نورت

hana يقول...

TheRiddle
والله وانا كمان باحب اكل الفراخ
بس نأكلها أوكى بلاش نتعامل معها ولا نربيها
ولا نشترىها حية كدة
أهو مالمبدأ بتاع الشعب المصرى دة
هوة اللى هيضيعة ههههه
وربنا مايرضاش باللى بيحصل دة والله

أنت الاجمل ميرسى
نورت

غير معرف يقول...

أنا معاكي ان تربية الطيور في المنازل خطر كبير علي صحة المواطنين وممكن يسبب في انتشار فيروس انفلونزا الطيور ,لكن الغلابه اللي زي دول اللي مصدر رزقهم متوقف عليه هيعيشوا ازاي. يا ستي أضمني لهم رعاية الحكومه وتوفير لهم لقمة العيش وهما مستعدين يبطلو يتعاملوا مع الطيور

غير معرف يقول...

على فكره انتى مماعكيش حق ابدا
الظاهر انك نسيتى ان انتى فى مصر
لما تلاقى الناس لسه جهله يبقى انت اكيد فى مصر
شوفى بقى حاكم مافيش حاجه اسمها انفلونزا الطيور
ده اسم الفره وبيجى على طول
ده رد هاتسمعيه من ناس كتير وانا سمعته من طبيب بيطرى
وعلى العموم ده موقف ايجابى منك
بس انى يستجاب لكم
تحياتى

hana يقول...

waheمتهيا لى لو المشكلة هتكون فى انهاD مصدر لرزق البعض من اللى بيربوا الطيور دى ممكن يغيروا نشاطهم يعنى يعملوا حاجة تانية
طيب ما هما بيعملوا جبنة وفطير وحاجات تانية كدة وبيبعوها
وبعدين ياريت الحكومة بجد تكون لها دور فعال بالنسبة للناس دوول
ولو انه فى مشاريع صغيرة للاسر المنتجة ممكن يأخدوا قروض بسيطة ويحاولوا يغيروا مصدر رزقهم يعملوا مثلا حاجة تانية
وبلاش التربية مش عارفة لىه انا حاسة ان المشكلة فيهم هما لانهم رافضين مبدأ التغيير لنشاطهم ورافضين التاقلم مع الظروف الجددة

تامر حسين يقول...

علي فكره انا نفسي لسه بربي عصافير وبغبغانات
بس انا عن نفسي عامل ستاير في البلكونه ومانع اي تعامل مع الطيور الي عايشه في الخلاء وهما لحد دلوقتي عايشين ولا جالهم انفلونزا ولا غيره بس لاني محافظ عليهاومخبيها
دي حاجا
تاني حاجا

لو انتي مبتكليش غير فراخ ولو ملكيش في اللحوم الحمراء
ومش نباتيه
تموتي يعني ومتكليش فراخ
وغير كده كنتاكي مثلا هنقول انها نضيفه والفراخ بتاعتها متعلمه وبتدرس بره
ابدا دي اوحش من الفراخ الي بنربيها في البيت
علي الاقل عارفين جايه منين ورايحه فين مش ماشيه علي حل شعرها
ههههههه
معلش انا قلبتها هزار بس غصب عني
لاني انا نفسي نفسي ابطل اكل فراخ بس مش بايدي وبحاول علي قدر الامكان اني اسخنا كويس لقتل الميكروبات زي ما وزاره الصحه قالتلنا
والعمر واحد والرب واحد
تحياتي

hana يقول...

بتربى عصافير طيب ليه بس مش خايف على نفسك ولا ايه
هو صحيح فصلها عن الطيور اللى برة يبعد المرض
بس لا الواحد يخاف برضو ههههه
وبعدين دى كنتاكى دى يابنى مشكلة بتعرف ياربى
عندك حق والله أنا شوفت فيديو غريب بيموتوا كدة الفراخ برجليهم
بجد مش بيدبحوهم دول بيقتلوهم وبعدين احنا ناكلهم تخيل اكيد انت عارف
منظر رهيب بجد
اللى يشوفة مايقربش لكنتاكى دى نهائى
ويقول ياريت ما اكلتها ييييييعععع
اما بقى بالنسبة للفراخ والله انا باكلها بس باكل المغلفة اللى فى الثلاجات
مش اللى بتنباع عند الناص صاحية كدة
ونورت يا تامر بجد

مدونة كسبان يقول...

سيبك انتى
طعمها لذيذ اوى الفراخ اللى انا كلت منها النهارده
هههه

تامر حسين يقول...

هههههههه
طيب مش تسيبلي حته كسبان
علي فكره انا شوفت الفيديو بتاعها
بس انا الي اعرفه ان ده في بلاد بره لان معنهمش شريعه اسلاميه يعني مش بيسمو وهو بيدبحو فبيكهربوهم

والله انا فكرت كتير اربي شنبي ولا اربي فراخ استقريت اربي بغبغانات
تحياتي ياتي ياتي

S H A H يقول...

انا شايف موضوع الفراخ لسة المناقشة في مفتوحة

عايز اقولك انا و زميلي هنا امبارح جايبين كنتاكي 21 قطعة و بعون الله خلصنهام احنا الاتنين بس

قمت صاحي النهاردة الفجر

ووقفت على سطح العمارة

و ادنت كوكوكوكوووووووووووووو

S H A H يقول...

بقولك ايه افتحيلنا مناقشة كدة عن الجمبري و الاستاكوزا و السلمون المدخن

على الاقل يبقى عندنا احساس نفسي بالراحة اني مش بشتريه عشان هوا في بلاوي

مش عشان غالي ولا حاجة

و اقول يا خسااارة هتحرم من الاستاكوزا

ممكن تبتدي ب استبحس الجمبري
او مخاطر دخان السلمون المدخن

hana يقول...

كسبان
طيب والله انمنا لسه اكلة فراخ النهاردةناكلها ااااة نربيها لاااااااا
ههههههه
نورت

hana يقول...

تامر
ههههه وكمان عاوز حته
والله يا تامر مش عارفة الموضوع دة عندنا كمان ولا برة بس
بصراحة اشك اكيد الطريقة واحدة برة وجواة
وداعا كنتاكى للابد


وبعدين بس خلى بالك من البغبغانات والله انا بحبها
لكن من بعد انفلونزا الطيور
كان ضرورى مايبقاش عندى منهم

hana يقول...

shah
انت بتأكل كنتاكى بعد اللى حصل
طيب هات حتة هههههههه
والله هى حلوة بس ....


بصراحة الجمبرى دة حكاية انا باحبة
والسلمون والاستاكوزا يابنى
ربنا يستر علينا
الواحد مش عارف يلاقيها منين ولا منين

غمض عينيك يقول...

عندك حق والله ياهنا
بس اتني عشان تغيري ثقافة بلد بحالها محتاجة وقت ومجهود كبير
اهالينا خدت على الطيور الطازة والمجمدة لا...ممكن تكون احسن بس برده لا
وكمان لازم توصلي لاماكن زي القري والمدن البعيدة وتوفري البديل المقنع لاهل البلد
الموضوع ممكن يتعمل وةالثقافة دي ممكن تتغير بس برده محتاجة خطة مدروسة عشان تغيري سلوك شعب كامل

تحياتي ليكي ونلمدونتك الجميلة
اول زيارة ومش الاخيرة

محمد سمير

-_- يقول...

انا والله مستحرم حكاية تربية الفراخ في المزرعة خوفا على الاطفال اللى ممكن بيقوا موجودين لكن الكل بيربيها

الكلام نوعان :كلام فارغ وكلام مليان كلام فارغ يقول...

يابنتى احنا شعب مابنفهمش الا لو لازم تجرى مصيبه
يعنى بعد اما تقع الفاس في الراس زي ما بيقولوا ونرجع نقول ياريت اللى جرى مكان
يلا حسبي الله ونعم الوكيل في الجهل
على فكره مدونتك حلوه اوى وزي العسل وحسيت انها طبيعيه

الكلام نوعان :كلام فارغ وكلام مليان كلام فارغ يقول...

يابنتى احنا شعب ما بنفهمش الا بعد فوات الاوان يعنى بعد لما تحصل المصيبه نفهم ونندم
مجونتك زي السكر ولله

hana يقول...

غمض عنيك
فعلا هى ثقافة شعب ولازم تتغير
ويمكن التغير مش هيكون بسرعة لانه
للأسف كثير رافض التغيير
رغم علمة الكامل بابعاد المشكلة
انا مش فاهمة ليه نبقى عارفين اغلط
ونستمر فيه !!!!!
لكن برضوا نحاول كل واحد فينا يحاول يقنع قد ما يقدر اللى يشوفهم بيتعاملوا مع الطيور او لسه بيشروا منها حيه كدة
ومانياس ابدا لاننا لازم نتخطى المشكلة مش نزودها

نورت بجد
تحياتى لك

hana يقول...

Sharm

والله فعلا الخوف على الاطفال كبير لانهم مايستحملوش المرض دة بجد
وكل البشر المرض دة قاتل
نورت حقيقى
تحياتى

hana يقول...

الكلام نوعان
والله انا معاكى أحنا شعب مش عاوزين نفهم ولا هنتحرك ونفهم الا بعد ما تحصل
كارثة وربنا يستر
الموضوع بجد كبير وان ما تلحقش
هتبقى كارثة
والله انا بتضايق لما اشوف الناس رافضة الحقيقة وورافضة تفهم

والله انتى اللى سكر ياقمر

نورتى يا حبى

غير معرف يقول...

البلوج جميل اوى بس اكتبى لينا شويه كمان عشان انتى مقله
عجبنى اوى البوست ده "بين أه ولاء" لانى للاسف اليومين دول بامر بنفس الحاله محتاج اخد قرار مصيرى وبقالى اسبوع لا باكل ولا بانام وبين اه ولا كل ربع ساعه بقرار ادعيلى ربنا يهدينى

hana يقول...

westtewest
بجد ميرسى اووى أنت الاجمل
وبعدينالواحد لما يحتار بين انه يأخد قرار
ومش عارف أة ولا لاء
أحس دة من أصعب المواقف اللى ممكن بتمر على نا نفسيا
لأن الحيرة بيكون سببها أنه القلب والعقل مش متفقين
وهى دى المشكلة
ربنا وياك يارب ويهديك للقرار السليم
اللى ترتاح وياة
نورت
تحياتى
هناا

 


تخــاريف هنونـــه. Template Design By: SkinCorner