الأربعاء، 5 ديسمبر 2007

رااحت عليكو





كشف نظر ما هو لازم كشف نظر
يااة دة الواحد نظرة ضعيف بشكل
لا بس مش اوى يعنى بنشوف برضة
كل حاجة قريبة انا قولت قريبة
بس نسيت اقول الاهم ما هو البعيد عن العين
بيبقى قريب من القلب ودة المهم ايه هو انا باخرف
ما هو انا فى تخاريف يعنى مسموح بالتخاريف
وان ماخرفنااش هنا هنخرف فين يعنى
هو انا مالى النهاردة
ما كانش كشف نضارة الواحد قعد فيه صحيح نص اليوم
لكن فدااة طبعا بتسالوا فدا مين
فدا الدكتور الشاطر اصل الدكتور الشاطر
بيبقى مشغول والزحمة عندة امر طبيعى
ولازم يكون عندة زحمة علشان يبقى شاطر
بس هو بيبقى شاطر فيبقى عندة زحمة
ولا بيبقى زحمة فيقولوا عليه شاطر!!!!!
اصلى قعدت اسال نفسى السؤالين دوول
احسن ما اقعد اقرا مجلات ما هو مش معقول
واحد ة راحة تشوف النظر تقرا مجلات دة حتى مش
اصول
المهم انى برضوا معرفتش اوصل لنتيجة يالله مش مشكله
يعنى هوة انا وصلت لنتيجة قبل كدة
ما كل حاجة فى حياتنا موصلناش لنتيجة فيها
اشمعنى يعنى عاوزة اوصل لنتيجة الوقت
خرفت تانى




نرجع لموضوعنا
فى وسط دة كله ومابين اللى قاعد بيتكلم فى الموبايل
واللى جايب ولادة معاة كلهم بنضارتهم
وموبايلاتهم اللى مابطلتش رن شكلهم مواعدين
الناس على ميعاد الدكتور


والاقى اللى بتسالنى
دى عنيكى
عنياامش فاهمة

عنيكى ولا عدساات
والله عنيا
- --- بافتكرهم عدسات

لا مش عدسات
___ بس شكلهم عدسات
لا والله ما عدساات

أصلى كنت عاوزة اعرف عدسات ولا مش عدسات
لا والله مش عدسات انا اصلا لون عنيا كدة
____ طب وايه اللى ياكد لى انها مش عدسات وان انتى مش بتضحكى عليا
....... ياربى وهاضحك عليكى بس ليه
___ يعنى يمكن مكسوفة
.... وهنكسف من ايه عادى لو عدسات هاقول بس مش عدسات
حتى شوفى ماما اهى هى كمان نفس اللون
------ طب مايمكن مامتك عدسات

------- ههههههه طيب
----- هو ايه اللى طيب يعنى عدسات
....... ياربى عدسات اذاى وانا باستعمل نضارة
لو عاوزة البس عدسات كنت لبست والنضارةبلاش منها
____ ااااااة عموما خلاص راحت عليكو
الناس كلها الوقتى بقت عنيها ملونة العدسات
حلت المشكلةهههههه






---- هى كانت مشكلة!!!!!



هو ايه سبب المشكلة عدم رضا الناس بملامحها اللى خلقها ربنا عليها
ولا مجرد نوع من التجميل ولو تجميل يبقى برضوا عدم رضا واعتراض
ولا يمكن حب لجمال الغرب ومحاولة التخلص من ملامحنا المصرية
ولا ايه
بس ارجع وأقول هى جات علي العدسات
دة كل يوم بنسمع عن ملايين من عمليات التجميل
اللى عاوزة تكبر شفايفها والى عاوزة تغير ملامح وجهها
ولا انفها واللى مش عجبها خدودها قالت تنفوخها شوية
واللى مش عاجبها شكلها خالص وحابه تبقى شكل
شاكيرا ولا بريتنى ولا غيرهم!!!!
فى سؤالى وسط دة كله محيرنى
لما واحدة بتغير ملامحها بتعرف نفسها ولا بتحس بغربه وانهاهى مش هى !!!!

واهى تخااريف

20 التعليقات:

MKSARAT - SAYED SAAD يقول...

بصراحة يا هنووون بوست تحفة
عمليات التجميل بقت اسهل حاجة دلوقتى عند كتير من الناس كل واحدة او واحدة عندة مشكلة ولو حاجة لا تذكر يجري على عمليات التجميل
المشكلة ان عمليات التجميل بقى الاقبال عليها اكتر علشان حاجة غير اللي اتوجد علشانها عمليات التجميل
تحسي ان الهدف من العملية بقى ملهوش دعوة بالتجميل اكتر من انه بقى لية ميول جنسية شوية
لما يكون حد عندة عيب خلقى او حصلة تشوة من اي حادثة او حاجة عملية التجميل بتقى كويسة لكن لما يكون الانسان كويس ويحاول يظهر مفاتنة اكتر علشان يلفت النظر اكتر فعلا بيبقى غلط جدا
بس انت مقولتليش صحيح عنيكي دية ولا عدسات :)
تحياتي يا هنونه

MKSARAT - SAYED SAAD يقول...
أزال المؤلف هذا التعليق.
كراكيب عادل يقول...

دول بيكذبوا الكذبة ويصدقوها

:)

hana يقول...

MKSARAT SAYED SAAD
اغرب حاجة انهم اصلا مش بيبقوا عندهم مشكلة علشان يعالجوها بيقوا مافيهومش
عيوب وبرضوا بيرحوا علشان يبقوا اكثر فتنه وجمال ولو انه الجمال شىء نسبى ومابيعتمدش على الملامح الخارجية الملامح الداخلية
الروح والاحساس اقوى بكثير

فعلا انا وياك الهدف من عمليات التجميل اتجة اتجاة تانى خالص
عمليات التجميل للناس اللى اصيبوا بتشوهات او حوادث او ماشابة وبتبقى بمثابة علاج
انما عمليات تجميل وربنا خلقها جميلة يبقى تعدى على خلقة الخالق سبحانه وتعالى
وتعديل علية واعتقد دينا الاسلامى لا يقرها الا للاسباب الى كان هدفها فعلا اصلاح ما افسدته الحوادث او ماشابه

هو انا لسه ماقولتش خليها سر بقى ههههههههههه.

اسمى التحايا

hana يقول...

كراكيب عادل

فعلا كدبة وكدبة كبيرة اوى انه الانسان يتجه لتغيير ملامحة علشان يحس انه فتان بزيادةوملفت
ويصدق دة وينسى انه مش هوة اللى بقى فتاان دى يد طبيب التجميل هى اللى فتانة

تحياتى لك

Dr. Diaa Elnaggar يقول...

تخاريف عاقلة جدا وتحتاج لتأمل مستفيض. بس أكتر حاجة عجبتني وابتسمت لها هي هذه الاسئلة السمجة عن كنهة عينيك، ألونهما حقيقي أم عدسات، فعلا سماجة غريبة جدا ولكنه آفة المجمتعات الجمعية، التي يعطي فيها المجموع لنفسه الحق في التدخل في الأمور الشخصية للأفراد.

عميق تحياتي

ضياء

hana يقول...

دضياء
بتعرف انه فعلا النقطة دى بالذات وتدخل الافراد بالسؤال عن اشياء منخصهمش وخصوصا انه بيكون لقاء اول لينا وبدون سابق معرفة بيستفذنى بشدة ويمكن عمرى ما حاولت اتدخل فى امور يمكن اقرب الاشخاص ليا اخواتى بالاسئلة الكثير عن حياتهم او اشيائهم الخاصة
فما بالك بالناس البعيدة واللى لاول مرة بنشوفها
باحس انه المفروض لكل شخص مناطق خاصة صعب الدخول ليها وصعب التساؤل عنها
بدون سابق معرفة او حتى بمعرفة
ولو اقولك انه فى يوم كانت صديقتى فى منتهى الغضب والانفعال وبتتخانق مع صديقة لها وانا جيت بالصدفة ولما الامور هديت لاقيتها بتسالنى
ليه يا هنا انتى ما حاولتيش تعرفى السبب وتستفسرى ايه الحكاية.

كان ردى عليها يومها ولنفترض انك عاوزة تحتفظى بالسبب لنفسك ومش عاوزة تعرفى حد حتى صاحبتك اللى هو انا يبقى ليه أسأل لو حابة تحكى يبقى هتقولى من غير سؤال
لاقيتها بعدها بتقول لكل اللى بيعرفونا من صديقات وزملاء
ان هنا دى باحترم فيها انها مش بتتدخل فى امور الاخرين حتى لو اصحابها

جميل جدا اننا نحط فواصل نقول لنفسنا فيها هنا نقف

بيعجبنى تأملك للأشياء جدا
لك وجهات نظر أحسها مختلفة
متميزة

كل الاحترام والتقدير لشخصك الرائع

rack-yourminds يقول...

ازيك يا هنا
----

الناس اللي بتعمل عمليات تجميل دوله ناس ربنا كرمهم بشوية قرشين وقاعدين يغيروا ويبوظوا في اجسادهم اللي خلقها ربنا واحسن في صنعها ,,ربنا يهديهم

قوليلي هو انتي ركبتي ليه نضاره شكلك بتذاكري كتيييير

تحياتي لكي

hana يقول...
أزال المؤلف هذا التعليق.
hana يقول...

rack-yourminds

الحمد لله
ازيك انت يا واحذ عامل ايه
......
على رأيك معاهم قرشين زيادة هههههه
بس عمليات التجميل دى حرام فى الدين الا اذا لها سبب
بس الناس خلاص ما عدتش بتفكر من المنطلق دة


انا عملت نضارة علشان شاشة الكمبيوتر فى المقام الاول لانى بقالى سنين باستعملها من غير نضارة فضعفت نظرى هههههههه
بس يعنى مش هلبسها ليل ونهار يعنى
هلبسها لما احس انى عاوزة البسها على
راى الدكتور
اسمى التحايا

غمض عينيك يقول...

الا قوليلي
هو انتي مركبه عدسات؟
p:

Hadota ... حدوتة يقول...

انا معرفش بصراحة حكاية عمليات التجميل دى


بس اكيد الانسان بيبقى مستغرب نفسه
معرفش حسة انه احساس مش حلو

تحياتى يا جميل

حسن ارابيسك يقول...

فكرتيني فكرة فيلم
أنا لا أكذب ولاكني أتجمل
وهي محور قضيتك التي طرحتيها
هناك من يفضل أن يصبح هو كما هو شاء الناس أن يقبلوه هكذا وان لم يشاءوا فلهم مطلق الحرية
وهناك من لاملكون الرضى عن اشياء كثيرة في حياتهم وليس مجرد الملامح فقط وهذه كارثة وتسبب معاناه كثيرة لهم

طريقة جميلة في الطرح

Dr. Diaa Elnaggar يقول...

كل سنة وانت طيبة وعيد سعيد عليكم جميعا

عميق تحياتي

ضياء

Dr. Diaa Elnaggar يقول...

كل سنة وانت طيبة وعام سعيد عليك يا رب.

عميق تحيتي

ضياء

The Manager يقول...

ممممممم
حقيقى دي عينك ولا عدسات ؟
ههههههه

لا فى وجهة نظري يعنى ( ولو اني مش بفكر بالشكل دة ) ان اي حد بيحب يكون شكله يعجب كل الناس إللى حواليه وبيعمل اى حاجة بقي علشان يبقي كدة ...

وإللى بيعجب كتير من شباب والرجال فى مصر هو العيون الخضرا مثلا والشعر الأصفر , لأنهم غالبا زهقانين من الشعر الأسود والعيون البني ....

وبرضه الرجال فى بلد غربي تلاقيهم بيحبوا قوي الملامح الشرقية , لدرجة اني شفت واحد ألماني مسلم متجوز واحدة نوبية ويقعد يحكي كتير عن الملامح النوبية ومعجب بيها قوي وابقي مستغرب انا وإللى حواليا من شدة إعجابه بالأنف مش عارف عامل ازاى والعيون إيه .. بس طبعا هو مش بيشوف الحاجات دي عنده فحاسس انها غربية وجميلة

فالناس عايزة تعجب باقي الناس ... لكن مش مبدأ نعيش نرضي الناس طول عمرنا ...يعنى هو احنا بنعبد ربنا ولا بنعبد الناس !!

اعجب الناس فى المعقول مش هروح مثلا اعمل شعري اصفر علشان امشي مع بنات !!
كلام فارغ يعنى

فأكيد بقي (إجابة على سؤالك ) الواحدة بتحس بغربة وانها مش هيا بس المتعة إللى هي بتعصل عليها اكبر شوية فبتستحمل ,, وهي طبيعي مش عارفة نفسها ولا دريانة بنفسها

تحياتى ليكي :)

يا مراكبي يقول...

عارفة .. مرة لما كنت في الكويت واحد صاحبي أصلع برضة أقنعني إننا نروح لطبيب لبناني متخصص في زراعة الشعر .. عارفه إيه اللي خلاني أهرب من العملية؟ إني حسيت إني مش هأعرف نفسي بعد العملية .. وإن الصلع ده جزء من شخصيتي وممكن أفقده

المهم إن الجاذبية موجودة .. ههههه

Dr. Ibrahim يقول...

على فكرة انا جالى حول فى مخى فى الموضوع ده
من كثر الكلام
ههههههههههههههه
والعدسات على فكرة مشكلة جامدة
ومش أى حد يعملها وإن لبسها بيبقى فيه إحتياطات عاود تتضيع العين بعيد الشر
وألف سلامة بس دول كام 7
ههههههههه انا لابس نضارة برده

د/هيما

Unknown يقول...

ههههههههههههههههه
طب في الاخر عملتي النظارة ولا لا ؟
سبحان الله كل انسان مش عاجبه حاله
انا لو كنت مكانك كنت عتعصب علي الست دي

hana يقول...

AMR ABUBAKR
ههههههههههه دة أنا عملتها وعملت بعديها كمان هههههههههههه
أهم في درج المكنب مش لابساه منهم حاة هههههههههههه

ماهو من زمان بئا ونكسف نرد على طنطات ههههههه وبعدين متعودة أنا لسه من قريب نفس السؤال انا شكلي هاحط بادج واكتب عليه مش عدسات هههه
منور يا عمرو

 


تخــاريف هنونـــه. Template Design By: SkinCorner