السبت، 16 يونيو، 2007

كنت بقرا بوست لبرايد وفكرتنى

من كام يوم كنت أنا وصحباتى متجمعين وحشونى اوووى
من زمان مشفناش بعض قولنا لا نحدد يوم ونقعد سوى
هو صحيح قعدنا فى البيت بس كانت ولا احلى رحلة لفينا اصلهم حلوين اوووى
وانا كمان بس مش هوة دة الموضوع البنات بقى بعد السلامات والبوس والاحضان والنسكافيه
ضرورى النسكافية ويشربوة بالاكراة هو كدةاللى يجى
محكوم عليه بالنسكافية الاول وبعدين يمكن اخد رايه فى حاجة تانية
اتكلمنا فى حاجات كثير فى حاجات راحت وحاجات لسه بتحصل ويا تعليقات
تموت من الضحك وما أعرفش اذاى الكلام دخل واتحول واحدة منهم قالت هنــااا
البت دى شكلها يجييب كام سنه
ما انتى عارفة هوة محتاجة أقولك
لا مش سنها كام يابت أنا قصدى حاجة تانيةيعنى لو تشوفيها كدة ماشية فى الشارع تديلها كام
وانا ايش عرفنى بهرب بقى هههه
قولى انتى
انا أديها 35
ياربى يخرب عقلك دة انتى بوظتى البت خالص طيب نقصيها حرام عليكى
والله شكلها كدة
أنا شكلى كدة طيب وأنتى
يا جماعة خلاص خلوها عليا المرة دى
لا بجد طب هى كام شكلها يجيب كام
أنتى عندك كام سنه يابت أعترفى اوعى تكونى مخبية
ما انتى عارفة يا هنااا
ههههههه بس صدقى تدى اكبر
كلكو شكلكوا اكبرمن سنكوا
أنتى يا بت انتى ذى ما انتى من ابتدائى
مش اووى كدة بس ماشى نعديها
بس كل دة ليه فى ايه ناويين على ايه بالظبط
عاوزين نتجوز
يخرب عقلكو وايه اللى فكركوا ما انتو كنتو كويسسين
يعنى طيب وانا مالى
لا بجد يا هناأحنا هنجوز امتى
اللى بقى عندة 25واللى عندها21 واللى عندها19
لاء بقى بصراحة ال19 دى كثير بقى روحى انتحرى
يا جماعة فيه ايه يعنى ولو حتى بقى عندنا مليون الجواز محتاج حد يتحب نرتاح له على الاقل
البنات كلها عمالة تتجوز وانتى عمالة تتفلسفى
أى حاجة بقى واحنا يعنى هنجيب اللى نرتاح له منيين
ما السوبر ماركت جايب نوع لسه جديد
بس بقى هو كل حاجة الجواز الواحد لازم يكون نفسه بس اذااى
بت يا هناااااا
هو انتى ولد دة انتى غريبة والله مخك دة اللى هيضيعك
طيب خليكى فى حالك
عاوزين نتجوز الايام بتجرى يعنى نتجوز امتى ونجييب ولاد امتى
ما تجرى يعنى هنحط على ضهرنا يافته ونقول عاوزين نتجوز
انا يا ختى بيجى لى كثير وانا اللى برفض
ما انتى عبيطة
هو اى حد وبعدين كل شىء نصيب
وامتى هييجى النصيب
يوم السبت الساعة 9ذ
أقولوكوا مافيش غير الاعلان اة نعمل اعلان
ولا اقولك نسجل كاسيت ياناس يا هوووو عاوزين نتجوز والله شوية مجانيين
والله ما حد مجنون غيرك

12 التعليقات:

wahed يقول...

كلامكم يضحك بجد بس عارفه لمة الاصحاب دي بالدنيا كلها ,الجلوس مع الاصدقاء والضحك معهم واسترجاع المواقف والذكريات بيدي طعم للحياة

hana يقول...

wahed
والله عندك حق لمة الاصحاب دى حلوة
أوووى خصوصا لما يبقوا دمهم خفيف
نورت البوست

محمد ياسر يقول...

بغض النظر عن لمة الاصحاب الجميلة
ما كله عايز يتجوز بس هو كل شئ باوانه مش هندور ولا هنعمل اعلان لكنه شئ مهم و اى حد بيستناه

تحياتى

hana يقول...

محمد
هوة فعلا شىء مهم او نقدر نقول علية شىء هيجى هيجى
وكلامك فعلا صح
نستنى لما يجى لواحدة ومش ندور علية
انا عن نفسى مش بادورعليه
لك أرق تحية

شيماء الجيزى يقول...

عارفه يا هنونه
وحشتنى اوى اوى اوى لمة الاصحاب دى
يااااااااااه

فكرتينى بيها
وحشتنى اوى اوى والله
يلا
ده نصيب
وهيجى يا هنونه

...........
بس بليز لما يجى احجزيلى واحد
:d

تحياتى يا قمر

hana يقول...

على طول يا قلبى أول ما ييجى احجز لك واحد
واخنارى بقى
أنتى
عاوزاة ألوان ولا...
كلة هيبقى موجووود ههه
نورتى يا قمرأنتى

elkamhawi يقول...

نعتبره اعلان يعنى ؟
ولا اية

hana يقول...

elkamhawi
ههههههه
لو اعلان يبقى غير مقصود
ولا ايه

S H A H يقول...

امال ليه انا حاسس ان مفيش عرايس؟؟

و العرايس حاسة ان مفيس عرسان

يمكن البنات بتتقل بطريقة غلط مثلا ساعات

يعني انا كنت اعرف زميلة ليا في الشغل هتموت على واحد معانا و لا مبينة اي حاجة و هوا كمان معجب بيها

و كان خايف يكلمها و يتحرج و يبقى منظره...........في الشغل يعني

طب متيجي نضبطلنا مدونة كدة نتعرف على بعض و ادي البلوجات واضحة قوي و كل واحد حاطط فكره و طريقته

يمكن نفهم بعض هنا اكتر

ايه ده طولت قوي

الظاهر انا اللي عندي مشكلة

سلام يا قمر

و تسلمي على التدوينة الحلوة دي

hana يقول...

S H A H
اذااى بقى والعرايس ماليه الدنيا
الظاهر المشكلة انهم مش لاقيين بعض لكن مش فى وجودهم
وومكن بجد يكون التقل فى البنات بيبقى بزيادة فيخلى
الموضوع كله يفشل

وبعدين والله فكرة المدونة دى تبقى روعة
لو تتنفذ

نورت بجد
وأنت أحلى

warDaya يقول...

يااااااااااااه فكرتيني بصحابي...من زماااااااااااان من ساعة ماشتغلت بقالي سنه اهو واحنا ماتلمناش خالص ولا مره...
سبحان الله كل صحابي من النوع اللي الضحك بالنسبالهم الميه والنور والهوا..الحمدلله ماصادفنيش حد رخم
ههههههههههه عارفه..صحابي بيقعدوا يقولوا نفس الكلام اللي صحابك بيقولوه...وانا بقعد اقولهم كده بردو هههههههههه
هم بقى واخدين موقف مني...عشان انا فرحانه اني من ساعة ماشتغلت وكل ماروح شركه يبقى كللللللللهم صوبيان...وكللللللللهم خاطبين...كلهم بلا استثناء...ببقى فرحانه جدا عشان بتعامل براحتي اوي...

وهم يقولولي ايه ده يااااااي...نقعد في شركه كل اللي فيها مربطين؟ليه ياماما؟

hana يقول...

تعرفى يا وردايه
احلى حاجة انه الصحاب يبقوا دمهم خفيف غير كدة ياربى
مش هيتفع ههههه


وبعدين صح تعالى هنا
انتى عاوزاهم يقعدوا فى شركة كلها مرتبطين طيب وبعدين

البنات كدة حالها يوقف على راى ماما ههههه
طيب يصطادوا عرسان منين

باقول لو فيه عرسان جاهزة كدة للحجز
كانت تتحل المشكلة
اللى عاوزة عريس تروح تحجز
وربنا يسهل بقى


بدل الاختفاء الغريب للعرسان على الساحة
ياربى دة انا باقول ساحة
انا خلاص اتجننت
هههههه

نورتى يا حبى

 


تخــاريف هنونـــه. Template Design By: SkinCorner